નાટો સમિટમાં એર્દોગનની અનોખી ભેટ: નામ કોતરેલી રિવોલ્વર અને કારતૂસ મળતાં નેતાઓ મૂંઝવણમાં

તુર્કીમાં યોજાયેલી નાટો (NATO) શિખર બેઠક બાદ એક અનોખી ઘટના ચર્ચાનું કેન્દ્ર બની છે. તુર્કીના રાષ્ટ્રપતિ રેસેપ તૈયપ એર્દોગને વિદાય ભેટ તરીકે અનેક વિશ્વ નેતાઓને તેમના નામ કોતરેલી વિન્ટેજ રિવોલ્વર અને કારતૂસ ભેટમાં આપ્યા હોવાનું અહેવાલોમાં જણાવાયું છે. આ ભેટ બાદ વિવિધ દેશોની સુરક્ષા એજન્સીઓ અને એરપોર્ટ સત્તાધિકારીઓ માટે તેને લઈ ખાસ પ્રક્રિયા હાથ ધરવાની સ્થિતિ સર્જાઈ હતી.

લાકડાના બોક્સમાં આપવામાં આવી ખાસ ભેટ
અહેવાલો અનુસાર, દરેક નેતાને સુંદર લાકડાના બોક્સમાં તેમના નામ સાથે કસ્ટમાઇઝ કરાયેલી વિન્ટેજ હેન્ડગન, ક્લીનિંગ કિટ અને કારતૂસ આપવામાં આવ્યા હતા. બોક્સ પર તુર્કીનો રાષ્ટ્રીય ધ્વજ અને નાટોનો લોગો પણ અંકિત કરવામાં આવ્યો હતો.

તુર્કીના સંરક્ષણ ઉદ્યોગનું પ્રદર્શન
આ ભેટ પાછળનો હેતુ તુર્કીના વધતા સંરક્ષણ ઉદ્યોગની ક્ષમતા વિશ્વ સમક્ષ રજૂ કરવાનો હોવાનું માનવામાં આવે છે. ભેટમાં આપવામાં આવેલી રિવોલ્વર ‘ગુમુસાય 357 મેગ્નમ’ મોડલ હોવાનું કહેવાય છે, જે તુર્કીની સરકારી સંરક્ષણ કંપની MKE દ્વારા 1990ના દાયકામાં વિકસાવવામાં આવેલી દુર્લભ સિક્સ-શૂટર રિવોલ્વર તરીકે ઓળખાય છે.

નેતાઓની પ્રતિક્રિયા
બ્રિટનના વડાપ્રધાન કીર સ્ટાર્મરે જણાવ્યું કે તેમને તેમના નામ કોતરેલી રિવોલ્વર સાથે ક્લીનિંગ કિટ અને કારતૂસ આપવામાં આવ્યા હતા. સ્પેનના વડાપ્રધાન પેડ્રો સાંચેઝ અને સ્લોવાકિયાના રાષ્ટ્રપતિ પીટર પેલેગ્રીનીએ પણ આવી ભેટ મળ્યાની પુષ્ટિ કરી હતી. કેનેડાના વડાપ્રધાન માર્ક કાર્નીએ હળવી ટિપ્પણી કરતાં કહ્યું કે, તેમની તરફથી અપાયેલી મેપલ સિરપની ભેટ તુર્કીની આ અનોખી ભેટ સામે ફીકી લાગી.

સુરક્ષા અને કસ્ટમ પ્રક્રિયામાં મુશ્કેલી
હથિયાર ભેટમાં મળતાં અનેક દેશોના સુરક્ષા નિયમોને કારણે નેતાઓની ટીમોને વધારાની પ્રક્રિયાનો સામનો કરવો પડ્યો હતો. બેલ્જિયમના વડાપ્રધાને પોતાની રિવોલ્વર બ્રસેલ્સ એરપોર્ટ પોલીસને સોંપી દીધી. પોલેન્ડના રાષ્ટ્રપતિની ભેટ કસ્ટમ ક્લિયરન્સ પ્રક્રિયામાં હોવાનું જણાવાયું. નેધરલેન્ડ અને સ્વીડનના નેતાઓએ રિવોલ્વર તુર્કીમાં આવેલી પોતાની એમ્બેસીમાં મોકલી આપી.

કેટલાક દેશો મ્યુઝિયમમાં કરશે દાન
ઇટાલીના વડાપ્રધાન જ્યોર્જિયા મેલોનીએ આ ભેટને સરકારી સંગ્રહમાં રાખવાનો નિર્ણય કર્યો છે. જ્યારે યુરોપિયન કમિશનની અધ્યક્ષ ઉર્સુલા વોન ડેર લેયેન તથા ગ્રીસના નેતાએ આ રિવોલ્વરને પોતાના દેશના સૈન્ય અથવા યુદ્ધ સંગ્રહાલયને દાન આપવાની યોજના બનાવી હોવાનું અહેવાલોમાં જણાવાયું છે.

હથિયારોની નિકાસમાં તુર્કીનો વધારો
તાજેતરના વર્ષોમાં તુર્કીએ સંરક્ષણ અને હથિયાર ઉત્પાદન ક્ષેત્રમાં નોંધપાત્ર પ્રગતિ કરી છે. ખાસ કરીને પિસ્તોલ અને શોટગનની નિકાસમાં તુર્કીએ વૈશ્વિક બજારમાં પોતાની મજબૂત હાજરી નોંધાવી છે. વર્ષ 2019થી 2024 દરમિયાન નાના હથિયારોની નિકાસમાં અમેરિકા અને ઇટાલી બાદ તુર્કી વિશ્વના અગ્રણી નિકાસકાર દેશોમાં સ્થાન મેળવ્યું હોવાનું વિવિધ અહેવાલોમાં જણાવાયું છે.