ઉનાળાની રજાઓ પહેલાં હવાઈ મુસાફરી મોંઘી, ફ્લાઈટ ભાડામાં 50% સુધીનો વધારો

ઉનાળાની રજાઓ નજીક આવતા પ્રવાસીઓ માટે હવાઈ મુસાફરી હવે વધુ ખર્ચાળ બની રહી છે. દેશી અને આંતરરાષ્ટ્રીય બંને રૂટ પર ફ્લાઈટના ભાડામાં 40 થી 50 ટકા સુધીનો વધારો નોંધાયો છે. જેટ ફ્યુઅલના વધી રહેલા ભાવ અને એરલાઈન્સ દ્વારા ફ્લાઈટ ક્ષમતામાં ઘટાડો થવાને કારણે મુસાફરોના ટ્રાવેલ બજેટ પર સીધી અસર પડી રહી છે.

રિપોર્ટ મુજબ દિલ્હીથી લેહ જતી ફ્લાઈટના ભાડામાં વાર્ષિક ધોરણે આશરે 74 ટકાનો વધારો થયો છે. શ્રીનગર અને શિમલા જેવા હિલ સ્ટેશનો માટેની ટિકિટો પણ 60 થી 68 ટકા સુધી મોંઘી થઈ છે. આંતરરાષ્ટ્રીય સ્તરે લંડન અને પેરિસ માટેની ફ્લાઈટના ભાડામાં 53 ટકાનો ઉછાળો નોંધાયો છે, જ્યારે થાઈલેન્ડ, સિંગાપોર અને અન્ય લોકપ્રિય પ્રવાસન સ્થળો માટેના ભાડામાં પણ ભારે વધારો થયો છે.

એવિએશન નિષ્ણાતોના જણાવ્યા અનુસાર જેટ ફ્યુઅલની કિંમતોમાં થયેલો મોટો વધારો આ પરિસ્થિતિ માટે મુખ્ય કારણ છે. પશ્ચિમ એશિયામાં વધેલા ભૂરાજકીય તણાવને કારણે ઘણી ફ્લાઈટ્સને લાંબા રૂટ પરથી પસાર થવું પડી રહ્યું છે, જેના કારણે ઇંધણ ખર્ચ વધી રહ્યો છે. સાથે જ કેટલીક મોટી એરલાઈન્સે ફ્લાઈટ્સની સંખ્યામાં ઘટાડો કર્યો છે, જેના કારણે માંગ સામે સપ્લાય ઓછી થતાં ભાડા વધુ વધી રહ્યા છે.

મોંઘા એરફેરના કારણે હવે ભારતીય પ્રવાસીઓ પણ પોતાના પ્રવાસના ડેસ્ટિનેશન બદલતા જોવા મળી રહ્યા છે. યુરોપ અને અમેરિકા જેવા ખર્ચાળ સ્થળોને બદલે લોકો હવે વિયેતનામ, શ્રીલંકા, નેપાળ અને મલેશિયા જેવા બજેટ-ફ્રેન્ડલી દેશોને વધુ પસંદ કરી રહ્યા છે. ઘરેલુ પર્યટનમાં પણ ઋષિકેશ, કુર્ગ અને શિલોંગ જેવા સ્થળો માટે એડવાન્સ બુકિંગમાં વધારો નોંધાયો છે.