Bindia
ખગોળપ્રેમીઓ માટે આગામી 31 મે, 2026 ની રાત્રિ ખાસ બનવાની છે. અધિક જ્યેષ્ઠ મહિનાની પૂનમના દિવસે આકાશમાં દુર્લભ ‘બ્લુ મૂન’નો નજારો જોવા મળશે. અંગ્રેજીમાં પ્રચલિત “Once in a blue moon” રૂઢિપ્રયોગ જે દુર્લભ ઘટનાને દર્શાવે છે, તે જ ખગોળીય ઘટના હવે લોકો જીવંત રીતે નિહાળી શકશે. વિશેષ વાત એ છે કે આ વખતે આ ઘટનાને ‘માઇક્રો બ્લુ મૂન’ તરીકે ઓળખવામાં આવી રહી છે, કારણ કે ચંદ્ર પૃથ્વીથી સામાન્ય કરતાં વધુ દૂર હશે.
ગુજરાત સહિત સમગ્ર દેશમાં દેખાશે બ્લુ મૂન
આ દુર્લભ ખગોળીય ઘટના જોવા માટે કોઈ ખાસ સ્થળે જવાની જરૂર નથી. અમદાવાદ, સુરત, રાજકોટ, વડોદરા સહિત સમગ્ર ગુજરાત તેમજ દેશના વિવિધ ભાગોમાં આકાશ સ્વચ્છ હશે તો લોકો આ બ્લુ મૂન નરી આંખે જોઈ શકશે.
ક્યારે જોવો સૌથી શ્રેષ્ઠ સમય?
ખગોળશાસ્ત્રીય ગણતરી મુજબ, 31 મે, 2026 ના રોજ બપોરે 2:15 વાગ્યે ચંદ્ર તેની પૂર્ણ કળાએ પહોંચશે. જોકે તે સમયે ભારતમાં દિવસ હોવાથી ચંદ્ર સ્પષ્ટ રીતે જોવા મળશે નહીં. ખગોળપ્રેમીઓ માટે આ નજારો માણવાનો શ્રેષ્ઠ સમય 31 મેના રોજ સાંજે સૂર્યાસ્ત પછી, અંદાજે સાંજે 7:15 વાગ્યા બાદનો રહેશે. ચંદ્રોદય પછી આખી રાત આ અદભૂત દ્રશ્ય નિહાળી શકાશે.
શું ચંદ્ર ખરેખર વાદળી રંગનો દેખાશે?
‘બ્લુ મૂન’ શબ્દ સાંભળતાં જ ઘણા લોકો માને છે કે ચંદ્ર વાદળી રંગનો દેખાશે, પરંતુ હકીકતમાં એવું નથી. ગુરુદેવ ઓબ્ઝર્વેટરીના સંચાલક દિવ્યદર્શન પુરોહિતના જણાવ્યા અનુસાર, જ્યારે એક જ અંગ્રેજી મહિનામાં બે પૂનમ આવે ત્યારે બીજી પૂનમને ‘બ્લુ મૂન’ કહેવામાં આવે છે. આ વર્ષે 1 મેના રોજ મહિનાની પહેલી પૂનમ આવી હતી અને હવે 31 મેના રોજ બીજી પૂનમ આવતાં આ ચંદ્રને ‘બ્લુ મૂન’ તરીકે ઓળખવામાં આવશે.
‘માઇક્રો બ્લુ મૂન’ કેમ કહેવાય છે?
આ વખતની ઘટના વધુ ખાસ એટલા માટે છે કે ચંદ્ર પૃથ્વીથી આશરે 2,52,360 માઇલ દૂર રહેશે. આ કારણે તે સામાન્ય પૂનમના ચંદ્ર કરતાં લગભગ 6 થી 7 ટકા જેટલો નાનો અને થોડો ઝાંખો દેખાશે. વૈજ્ઞાનિકો આ કારણસર તેને ‘માઇક્રો બ્લુ મૂન’ કહી રહ્યા છે.
દર અઢી વર્ષે બને છે આ અનોખો સંયોગ
ખગોળવિજ્ઞાન મુજબ બ્લુ મૂનની ઘટના આશરે દર 30 મહિનામાં એકવાર સર્જાય છે. આ અગાઉ 31 ઓગસ્ટ, 2023 ના રોજ આ નજારો જોવા મળ્યો હતો. હવે આગામી આવી ઘટના ડિસેમ્બર 2028માં જોવા મળશે. ખગોળપ્રેમીઓ માટે આ એક અનોખો અવસર છે. કોઈ ટેલિસ્કોપ કે ખાસ સાધનની જરૂર વગર ખુલ્લા આકાશ હેઠળ પૂર્વ-દક્ષિણ દિશામાં ચંદ્રોદય સમયે આ અદ્ભુત દ્રશ્ય માણી શકાય છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
