Akshay Nayak
ઓસ્ટ્રેલિયાના અનુભવી બેટ્સમેન અને સ્ટેન્ડ ઈન કેપ્ટન સ્ટીવ સ્મિથે શ્રીલંકા સામે રમાઈ રહેલી પ્રથમ ટેસ્ટ મેચ દરમિયાન ટેસ્ટ ક્રિકેટમાં 10,000 રન પૂરા કર્યા છે. તે ટેસ્ટમાં 10000 રન પૂરા કરનાર ચોથો ઓસ્ટ્રેલિયન બેટ્સમેન બન્યો છે. સ્મિથ ઓસ્ટ્રેલિયાનો બીજો બેટ્સમેન છે જેણે આ સિદ્ધિ સૌથી ઝડપી હાંસલ કરી છે. સ્મિથે આવું કરતાની સાથે જ મેદાન પર હાજર દર્શકો અને શ્રીલંકન ટીમના ખેલાડીઓએ તાળીઓ પાડીને તેનું સ્વાગત કર્યું હતું.
-> આ સિદ્ધિ મેળવનાર વિશ્વનો 15મો બેટ્સમેન છે :- 35 વર્ષીય સ્મિથ ટેસ્ટમાં 10,000 રન પૂરા કરીને સચિન તેંડુલકર, રિકી પોન્ટિંગ અને બ્રાયન લારા જેવા દિગ્ગજોની યાદીમાં સામેલ થઈ ગયો છે. ટેસ્ટ ઈતિહાસમાં 10000 રન પૂરા કરનાર સ્મિથ વિશ્વનો 15મો બેટ્સમેન છે. તેના પહેલા એલન બોર્ડર, સ્ટીવ વો અને પોન્ટિંગ ઓસ્ટ્રેલિયન બેટ્સમેન છે જેમણે આ સિદ્ધિ મેળવી છે. સ્મિથે 115 ટેસ્ટ અને 205 ઇનિંગ્સમાં આ સિદ્ધિ હાંસલ કરી છે. બ્રાયન લારા, સચિન અને કુમાર સંગાકારાએ 195 ઇનિંગ્સમાં ટેસ્ટમાં 10000 રન પૂરા કર્યા હતા.
-> સૌથી વધુ ટેસ્ટ સદી ફટકારનાર ઓસ્ટ્રેલિયાનો બીજો બેટ્સમેન :- સ્મિથની ટેસ્ટ સફર 2010માં પાકિસ્તાન સામે શરૂ થઈ હતી. તેનું ડેબ્યૂ યાદગાર રહ્યું ન હતું અને તેણે બંને દાવમાં સંયુક્ત રીતે 13 રન બનાવ્યા હતા. જો કે, સમયની સાથે તે ઓસ્ટ્રેલિયાના સફળ બેટ્સમેનોમાંનો એક બન્યો અને મિડલ ઓર્ડરમાં ટીમના મજબૂત બેટ્સમેન તરીકે ઉભરી આવ્યો. ટેસ્ટ ફોર્મેટમાં તેના નામે 34 સદીઓ છે. અને તે સૌથી વધુ ટેસ્ટ સદી ફટકારનાર બીજા ઓસ્ટ્રેલિયન બેટ્સમેન છે. માત્ર રિકી પોન્ટિંગે તેના કરતા વધુ સદી ફટકારી છે, જેના નામે ટેસ્ટમાં 41 સદી છે.
