અમદાવાદના નવરંગપુરામાં રિક્ષામાંથી ખુલ્લેઆમ દારૂના વેચાણનો વીડિયો વાયરલ, પોલીસ તપાસમાં

ગુજરાતમાં દારૂબંધી હોવા છતાં રાજ્યના વિવિધ વિસ્તારોમાંથી ગેરકાયદે દારૂના વેચાણના કિસ્સાઓ સતત સામે આવતા રહે છે. હવે અમદાવાદના પોશ વિસ્તાર નવરંગપુરામાં જાહેર માર્ગ પર રિક્ષામાંથી ખુલ્લેઆમ દારૂનું વેચાણ થતું હોવાનો વીડિયો સોશિયલ મીડિયા પર વાયરલ થતાં પોલીસ હરકતમાં આવી છે.

લિબર્ટી સર્કલ નજીક રિક્ષામાંથી દારૂનું વેચાણ
11 જુલાઈથી સોશિયલ મીડિયા પર વાયરલ થઈ રહેલા વીડિયોમાં નવરંગપુરાના લિબર્ટી સર્કલ નજીક રોડની બાજુમાં ઝાડ નીચે ઉભેલી એક રિક્ષામાંથી અંગ્રેજી અને દેશી દારૂનું ખુલ્લેઆમ વેચાણ થતું હોવાનું જોવા મળે છે. સ્થાનિક લોકોના જણાવ્યા મુજબ, આ વિસ્તારની આસપાસ ગર્લ્સ હોસ્ટેલ તેમજ પોલીસ સ્ટેશન પણ આવેલું છે, જેના કારણે સુરક્ષા અને કાયદો-વ્યવસ્થાને લઈને પ્રશ્નો ઊભા થયા છે.

વીડિયો વાયરલ થતાં પોલીસ હરકતમાં
આ મામલે નવરંગપુરા પોલીસ સ્ટેશનના પોલીસ ઇન્સ્પેક્ટરે જણાવ્યું કે વાયરલ વીડિયો અંગે તપાસ શરૂ કરવામાં આવી છે. પોલીસ ટીમને લિબર્ટી ચાર રસ્તા વિસ્તારમાં મોકલી તપાસ કરાવવામાં આવી રહી છે. પોલીસના જણાવ્યા મુજબ, સંબંધિત વ્યક્તિઓ સામે થોડા દિવસ પહેલાં જ એક ગુનો નોંધાયો હતો. જો તેઓ ફરીથી ગેરકાયદે દારૂનું વેચાણ કરતા ઝડપાશે તો તેમની સામે વધુ એક કેસ નોંધવામાં આવશે અને કડક કાનૂની કાર્યવાહી હાથ ધરાશે.

સ્થાનિકોમાં ચિંતા
જાહેર સ્થળે અને વ્યસ્ત વિસ્તારમાં ખુલ્લેઆમ દારૂનું વેચાણ થતું હોવાના દાવા સામે આવતા સ્થાનિકોમાં ચિંતા જોવા મળી રહી છે. હવે પોલીસની તપાસ બાદ સમગ્ર મામલામાં શું કાર્યવાહી થાય છે તેના પર સૌની નજર છે.