ખેડૂતો માટે ખુશખબર: કપાસની ખેતી પર સરકાર આપશે હેક્ટર દીઠ ₹14,000 સહાય, જાણો કોને મળશે લાભ

કપાસનું ઉત્પાદન વધારવા, આયાત પર નિર્ભરતા ઘટાડવા અને ખેડૂતોની આવકમાં વધારો કરવા માટે કેન્દ્ર સરકારે વર્ષ 2026-27થી 2030-31 સુધી ‘મિશન ફોર કોટન પ્રોડક્ટિવિટી’ (કપાસ ક્રાંતિ મિશન) અમલમાં મૂક્યું છે. આ યોજના હેઠળ કપાસની આધુનિક ખેતી પદ્ધતિ અપનાવતા ખેડૂતોને હેક્ટર દીઠ ₹14,000 સુધીની ઇનપુટ સહાય આપવામાં આવશે.

ગુજરાતના કૃષિ મંત્રી જીતુભાઈ વાઘાણીએ જણાવ્યું કે, ગુજરાત દેશના કપાસ ઉત્પાદનમાં અગ્રણી રાજ્ય હોવાથી આ મિશન હેઠળ રાજ્યને ₹134.80 કરોડનું બજેટ ફાળવવામાં આવ્યું છે.

21 જિલ્લાના ખેડૂતોને મળશે લાભ
આ યોજના હેઠળ ગુજરાતના 21 જિલ્લામાં એક લાખ હેક્ટરથી વધુ વિસ્તાર આવરી લેવાનો લક્ષ્યાંક રાખવામાં આવ્યો છે. આધુનિક ખેતી પદ્ધતિ અપનાવી કપાસનું ઉત્પાદન વધારવાનો મુખ્ય હેતુ છે.

કઈ પદ્ધતિ માટે કેટલી સહાય?
મિશન હેઠળ બે અલગ-અલગ ખેતી પદ્ધતિ માટે સહાયની જોગવાઈ કરવામાં આવી છે.

ક્લોઝર સ્પેસિંગ ટેક્નોલોજી
જે ખેડૂતો **90 સે.મી. × 30 સે.મી.**ના અંતરે કપાસનું વાવેતર કરશે અથવા કર્યું હશે, તેમને પ્રતિ હેક્ટર ₹14,000ની ઇનપુટ સહાય આપવામાં આવશે.

ઇન્ટિગ્રેટેડ ક્રોપ મેનેજમેન્ટ
જે ખેડૂતો 90 સે.મી. × 60 સે.મી.ના અંતરે કપાસનું વાવેતર કરશે અથવા કર્યું હશે, તેમને પ્રતિ હેક્ટર ₹7,500ની સહાય મળશે.

એક ખેડૂતને કેટલો લાભ મળશે?
યોજનાનો લાભ એક ખેડૂતને વર્ષ દરમિયાન વધુમાં વધુ 2 હેક્ટર વિસ્તાર સુધી જ મળશે.
સહાય મેળવવા માટેની શરતો
– યોજનાનો લાભ મેળવવા માટે ખેડૂતોને નીચેની શરતોનું પાલન કરવું પડશે.
– સરકાર માન્ય અથવા પ્રમાણિત કપાસની જાતનું વાવેતર કરેલું હોવું જોઈએ.
– મંજૂર થયેલા બીટી કપાસના બિયારણનો ઉપયોગ કરેલો હોવો જોઈએ.
– ફાર્મર રજિસ્ટ્રી કરાવેલી હોવી જરૂરી છે.
– નિર્ધારિત વાવેતર અંતરનું પાલન કરવું ફરજિયાત રહેશે.

ખેડૂતોને મળશે તાલીમ
આ મિશન હેઠળ ખેડૂતોને આધુનિક ખેતી પદ્ધતિ, પાક વ્યવસ્થાપન અને વધુ ઉત્પાદન મેળવવા માટે વર્ષ દરમિયાન વિવિધ તાલીમ કાર્યક્રમો પણ યોજવામાં આવશે.

આજથી શરૂ થઈ ઓનલાઈન અરજી
કૃષિ વિભાગે જણાવ્યું છે કે 10 જુલાઈ, 2026થી i-ખેડૂત પોર્ટલ પર ઓનલાઈન અરજી પ્રક્રિયા શરૂ કરવામાં આવી છે. જે ખેડૂતો ચાલુ સિઝનમાં 90 × 30 સે.મી. અથવા 90 × 60 સે.મી.ના અંતરે કપાસનું વાવેતર કરી ચૂક્યા છે અથવા હજુ વાવેતર કરવાની યોજના ધરાવે છે, તેઓ યોજના હેઠળ સહાય મેળવવા માટે i-ખેડૂત પોર્ટલ પર અરજી કરી શકે છે. કૃષિ મંત્રી જીતુભાઈ વાઘાણીએ તમામ પાત્ર ખેડૂતોને સમયસર ઓનલાઈન અરજી કરીને સરકારની આ સહાય યોજનાનો લાભ લેવા અપીલ કરી છે.