Bindia
પ્રશાંત મહાસાગરમાં સર્જાયેલું શક્તિશાળી ટાયફૂન ‘બાવી’ (Typhoon Bavi) પૂર્વ એશિયાના અનેક દેશો માટે ગંભીર ખતરો બની રહ્યું છે. જાપાન, તાઈવાન, ચીન અને ફિલિપાઈન્સમાં વાવાઝોડાને લઈને હાઈ એલર્ટ જાહેર કરવામાં આવ્યું છે. હવામાન વિભાગોએ ભારે વરસાદ, તેજ પવન, પૂર અને ભૂસ્ખલનની ચેતવણી આપી છે. આ વાવાઝોડું એવા સમયે આગળ વધી રહ્યું છે જ્યારે ચીનના કેટલાક વિસ્તારો પહેલેથી જ ભારે વરસાદ અને પૂરથી પ્રભાવિત છે.
162 કિમી પ્રતિ કલાકની ઝડપે ફૂંકાઈ શકે પવન
હવામાન વિભાગના જણાવ્યા મુજબ, ટાયફૂન ‘બાવી’ જાપાનના સાકિશિમા ટાપુઓ નજીકથી પસાર થવાની સંભાવના છે. વાવાઝોડા દરમિયાન પવનની ગતિ 162 કિલોમીટર પ્રતિ કલાક સુધી પહોંચી શકે છે, જેના કારણે દરિયાકાંઠાના વિસ્તારોમાં ભારે નુકસાનની આશંકા છે.
જાપાનમાં બ્લેકઆઉટ, સેંકડો ફ્લાઇટ્સ રદ
વાવાઝોડાની અસર જાપાનના ઓકિનાવા અને આસપાસના વિસ્તારોમાં જોવા મળી રહી છે. લગભગ 900થી વધુ ઇમારતોમાં વીજ પુરવઠો ખોરવાયો.
અનેક વિસ્તારોમાં લોકો ઘરોને સુરક્ષિત બનાવવા તૈયારીમાં લાગી ગયા છે. જાપાન એરલાઇન્સે 100થી વધુ ફ્લાઇટ્સ રદ કરી છે. ઓલ નિપ્પોન એરવેઝ (ANA)એ પણ 160થી વધુ ફ્લાઇટ્સ રદ કરતાં હજારો મુસાફરો પ્રભાવિત થયા છે.
તાઈવાનમાં 36 ઇંચ સુધી વરસાદની શક્યતા
તાઈવાનના હવામાન વિભાગે ચેતવણી આપી છે કે વાવાઝોડું સીધું લેન્ડફોલ ન કરે તો પણ કેટલાક વિસ્તારોમાં એક મીટર (આશરે 36 ઇંચ) જેટલો ભારે વરસાદ પડી શકે છે. ભારે વરસાદને કારણે પૂર અને ભૂસ્ખલનની આશંકા વ્યક્ત કરવામાં આવી છે.
તાઈપેઈમાં શાળાઓ બંધ, ફ્લાઇટ્સ પર અસર
વાવાઝોડાની ગંભીરતાને ધ્યાનમાં રાખીને તાઈવાનની રાજધાની તાઈપેઈમાં શાળાઓ બંધ રાખવામાં આવી છે. જાપાન, હોંગકોંગ અને અન્ય દેશો માટેની અનેક આંતરરાષ્ટ્રીય ફ્લાઇટ્સ પણ રદ કરવામાં આવી છે.
ચીનમાં મોટા પાયે તૈયારીઓ
ચીનના ઝેજિયાંગ અને ફુજિયાન પ્રાંતોમાં વાવાઝોડાની અસરને ધ્યાનમાં રાખીને તંત્રે વિશેષ તૈયારીઓ શરૂ કરી છે. 17,000થી વધુ લોકોને સુરક્ષિત સ્થળે ખસેડવામાં આવ્યા છે. 1.70 લાખથી વધુ બચાવકર્મીઓને સ્ટેન્ડબાય પર રાખવામાં આવ્યા છે. માછીમારોને તાત્કાલિક દરિયામાંથી પરત ફરવાનો આદેશ આપવામાં આવ્યો છે. કેટલીક ફેરી સેવાઓ પણ સ્થગિત કરવામાં આવી છે.
વેન્ઝોઉ શહેર પર સૌથી મોટું જોખમ
ચીનના પૂર્વ કિનારે આવેલું લગભગ 1 કરોડની વસતી ધરાવતું વેન્ઝોઉ શહેર વાવાઝોડાના સંભવિત લેન્ડફોલના માર્ગમાં હોવાનું માનવામાં આવે છે. સ્થાનિક વહીવટીતંત્રે તાત્કાલિક સાવચેતીના પગલાં અમલમાં મૂક્યા છે.
અન્ય કુદરતી આફતોથી પણ ચીન પર સંકટ
ચીનના અનેક વિસ્તારોમાં તાજેતરમાં ભારે વરસાદ, પૂર અને ભૂસ્ખલનની ઘટનાઓમાં અનેક લોકોના મોત થયા છે. કેટલીક જગ્યાએ ડેમને નુકસાન પહોંચ્યું છે, જ્યારે અનેક વિસ્તારોમાં વીજ પુરવઠો ખોરવાયો હતો અને લોકો દિવસો સુધી ફસાઈ ગયા હતા.
ફિલિપાઈન્સમાં પણ ભારે વરસાદ અને ભૂસ્ખલન
ટાયફૂન ‘બાવી’ના પ્રભાવથી ફિલિપાઈન્સના મિન્ડાનાઓ વિસ્તારમાં ભારે વરસાદ બાદ અનેક સ્થળોએ ભૂસ્ખલન થયું છે. સ્થાનિક અહેવાલો અનુસાર, આ દુર્ઘટનામાં ઓછામાં ઓછા 15 લોકોના મોત થયા છે, જ્યારે બચાવ કામગીરી હજુ પણ ચાલુ છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
