Bindia
અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર કસ્ટમ્સ વિભાગે ડ્રગ્સ હેરાફેરીના મોટા કેસનો પર્દાફાશ કર્યો છે. મલેશિયાના કુઆલાલંપુરથી આવેલી ફ્લાઇટમાં મુસાફરી કરનાર એક વ્યક્તિ પાસેથી અંદાજે 9.30 કિલોગ્રામ હેરોઇનનો જથ્થો જપ્ત કરવામાં આવ્યો છે, જેની આંતરરાષ્ટ્રીય બજારમાં કિંમત આશરે ₹45 થી ₹50 કરોડ જેટલી હોવાનું અનુમાન છે.
હેન્ડ બેગની તપાસમાં ખુલ્યો કેસ
શંકાસ્પદ મુસાફરના હેન્ડ બેગના એક્સ-રે સ્ક્રીનિંગ દરમિયાન અધિકારીઓને શંકાસ્પદ છબીઓ જોવા મળી હતી. ત્યારબાદ બેગની વિગતવાર તપાસ કરવામાં આવી. તપાસ દરમિયાન “ફૂડ સપ્લિમેન્ટ” અને “કોકોનટ ફ્લેવર”ના લેબલવાળા પેકેટ મળ્યા હતા. પરંતુ તેને ખોલતા અંદરથી સફેદ પાવડર અને દાણાદાર પદાર્થ મળી આવ્યો હતો. FSLની પ્રાથમિક તપાસમાં તે હેરોઇન હોવાનું પુષ્ટિ થયું હતું.
કેરળના આરોપીની ધરપકડ
કસ્ટમ્સ વિભાગે NDPS Act, 1985 હેઠળ ગુનો નોંધ્યો છે અને આરોપીની ધરપકડ કરી છે. આરોપી મૂળ કેરળના વાયનાડનો રહેવાસી હોવાનું સામે આવ્યું છે. પ્રાથમિક પૂછપરછ મુજબ, મલેશિયાના કુઆલાલંપુરની એક હોટેલમાં એક અજાણી મહિલાએ તેને આ ડ્રગ્સનો જથ્થો આપ્યો હતો અને આ કામ બદલ તેને મોટી રકમ ચૂકવવામાં આવી હતી.
દિલ્હી સુધી પહોંચાડવાનો હતો જથ્થો
તપાસમાં જાણવા મળ્યું છે કે આ ડ્રગ્સનો જથ્થો અમદાવાદથી દિલ્હી પહોંચાડવાનો હતો. હવે કસ્ટમ્સ વિભાગ સમગ્ર આંતરરાષ્ટ્રીય ડ્રગ્સ નેટવર્ક સુધી પહોંચવા માટે તપાસ આગળ ધપાવી રહી છે. દિલ્હીમાં આ જથ્થો કોને પહોંચાડવાનો હતો અને આ પાછળ કયો સિન્ડિકેટ કાર્યરત છે તેની પણ તપાસ ચાલી રહી છે. સાથે જ આરોપીના બેંક ટ્રાન્ઝેક્શન અને સંપર્કોની પણ તપાસ શરૂ કરવામાં આવી છે.
એરપોર્ટ પર સુરક્ષા વધુ કડક
છેલ્લા કેટલાક દિવસોમાં અમદાવાદ એરપોર્ટ પર ડ્રગ્સ સંબંધિત બે મોટા કેસ સામે આવ્યા છે. એક દિવસ પહેલાં જ થાઇલેન્ડથી આવેલા એક મુસાફર પાસેથી પણ 6.54 કિલોગ્રામ ગાંજાનો જથ્થો ઝડપાયો હતો. આ સતત ઘટનાઓને ધ્યાનમાં રાખીને કસ્ટમ્સ અને સુરક્ષા એજન્સીઓએ એરપોર્ટ પર સર્વેલન્સ અને ચેકિંગ વધુ કડક બનાવ્યું છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
