કેરળમાં CM પદને લઈને કોંગ્રેસમાં ઘમાસાણ, હાઈકમાન્ડ મૂંઝવણમાં

તિરુવનંતપુરમ: કેરળ વિધાનસભા ચૂંટણીમાં યુનાઈટેડ ડેમોક્રેટિક ફ્રન્ટ (UDF)ને મળેલી જીત બાદ હવે કોંગ્રેસમાં મુખ્યમંત્રી પદને લઈને આંતરિક ખેંચતાણ તેજ બની છે. મુખ્યમંત્રી કોણ બનશે તે મુદ્દે પાર્ટી અંદર મતભેદ ખુલ્લેઆમ સામે આવી રહ્યા છે, જેના કારણે કોંગ્રેસ હાઈકમાન્ડ માટે સ્થિતિ મુશ્કેલ બની છે.

મુખ્યમંત્રી પદ માટે ત્રણ મોટા દાવેદાર
કેરળ કોંગ્રેસમાં હાલ મુખ્યમંત્રી પદ માટે ત્રણ નામોની સૌથી વધુ ચર્ચા ચાલી રહી છે.
વી.ડી. સતીશન
વી.ડી. સતીશનને જનતા અને UDFના કેટલાક સાથી પક્ષોનું મજબૂત સમર્થન હોવાનું માનવામાં આવે છે. ખાસ કરીને IUML (મુસ્લિમ લીગ) તરફથી પણ તેમને ટેકો મળતો હોવાના અહેવાલ છે. સૂત્રો મુજબ સતીશને સ્પષ્ટ કરી દીધું છે કે તેઓ મુખ્યમંત્રી પદ સિવાય કોઈ અન્ય ભૂમિકા સ્વીકારવા તૈયાર નથી.

કે.સી. વેણુગોપાલ
કોંગ્રેસ હાઈકમાન્ડ અને રાહુલ ગાંધીની પ્રથમ પસંદગી તરીકે કે.સી. વેણુગોપાલનું નામ ચર્ચામાં છે. કેટલાક ધારાસભ્યો પણ તેમના સમર્થનમાં હોવાનું કહેવાય છે. પરંતુ વેણુગોપાલ હાલમાં સાંસદ હોવાથી તેમને મુખ્યમંત્રી બનવા માટે વિધાનસભાની પેટાચૂંટણી લડવી પડશે, જેના કારણે પાર્ટી માટે નવી રાજકીય પડકારો ઊભા થઈ શકે છે.

રમેશ ચેન્નીથલા
રમેશ ચેન્નીથલા પણ મુખ્યમંત્રી પદના દાવેદારોમાં સામેલ છે. જોકે, હાઈકમાન્ડ તેમને વિધાનસભાના સ્પીકર તરીકે જવાબદારી આપવાનો વિચાર કરી રહ્યું હોવાનું કહેવાય છે.

સતીશન સમર્થકોનું શક્તિ પ્રદર્શન
અહેવાલો અનુસાર, તિરુવનંતપુરમ સહિત કેટલાક વિસ્તારોમાં સતીશનના સમર્થકો ખુલ્લેઆમ શક્તિ પ્રદર્શન કરી રહ્યા છે. બીજી તરફ વેણુગોપાલના સમર્થનમાં પણ પોસ્ટર અભિયાન શરૂ થયું છે. પાર્ટી અંદરની આ ગતિવિધિઓને કારણે કોંગ્રેસ હાઈકમાન્ડ પર દબાણ વધી રહ્યું છે.

કર્ણાટક જેવી સ્થિતિ?
રાજકીય વિશ્લેષકો આ પરિસ્થિતિની તુલના કર્ણાટકમાં સિદ્ધારમૈયા અને ડી.કે. શિવકુમાર વચ્ચે સર્જાયેલા નેતૃત્વ વિવાદ સાથે કરી રહ્યા છે. હાઈકમાન્ડ માટે હવે તમામ જૂથોને સંતુલિત રાખીને નિર્ણય લેવો પડકારરૂપ બની રહ્યો છે.

રાહુલ ગાંધી એક્શનમાં
પરિસ્થિતિને નિયંત્રિત કરવા માટે રાહુલ ગાંધીએ કેરળ કોંગ્રેસના પૂર્વ પ્રમુખો અને વર્કિંગ પ્રેસિડેન્ટ્સ સાથે મહત્વપૂર્ણ બેઠક બોલાવી છે. કોંગ્રેસના વરિષ્ઠ નેતાઓ માને છે કે વિધાનસભાની મુદત પૂર્ણ થવા પહેલા સહમતિથી નિર્ણય લેવો જરૂરી છે, કારણ કે અન્ય રાજ્યોમાં નવી સરકારો શપથ લઈ ચૂકી છે અને કેરળમાં પણ જલ્દી નેતૃત્વ સ્પષ્ટ કરવાની માંગ વધી રહી છે.