ભાવનગરમાં મોટી કાર્યવાહી: 5 બાંગ્લાદેશી મહિલાઓ ઝડપાઈ, પોલીસે શરૂ કરી તપાસ

ભાવનગરમાં પોલીસે મોટી કાર્યવાહી હાથ ધરી છે. મળતી માહિતી મુજબ Special Operations Group (SOG)એ બાતમીના આધારે દરોડા પાડી પાંચ બાંગ્લાદેશી મહિલાઓને ઝડપી પાડી છે. આ કાર્યવાહી બોર તલાવ વિસ્તારમાં કરવામાં આવી હતી.

ઝડપાયેલ મહિલાઓની ઓળખ પાખી ખાનમ (22), રીમા અખ્તર ઉર્ફે લીલી (35), લાખી બેગમ (35), સુબરના બેગમ (39) અને લેબીના ખાનમ (33) તરીકે થઈ છે. પોલીસે તેમની પાસેથી બાંગ્લાદેશી સીમકાર્ડ અને કેટલાક દસ્તાવેજો પણ કબજે કર્યા હોવાનું જાણવા મળી રહ્યું છે.

એસઓજી દ્વારા તમામ મહિલાઓને વધુ પૂછપરછ માટે એસપી ઓફિસ ખાતે લઈ જવાઈ છે. પોલીસ હવે તપાસ કરી રહી છે કે મહિલાઓ કેટલા સમયથી ગુજરાતમાં રહેતી હતી, તેઓ ક્યાં-ક્યાં ગઈ હતી અને આ મામલે અન્ય કોણ લોકો સંડોવાયેલા હોઈ શકે છે.

પ્રાથમિક પૂછપરછ દરમિયાન મહિલાઓ પાસે કોઈ માન્ય પાસપોર્ટ અથવા વિઝા ન હોવાનું સામે આવ્યું છે. મહિલાઓએ પોતે બાંગ્લાદેશી નાગરિક હોવાની કબૂલાત આપી હોવાનું પણ સૂત્રો જણાવી રહ્યા છે. પોલીસના મતે તપાસ આગળ વધતા આ મામલે વધુ મહત્વના ખુલાસા થવાની શક્યતા છે.