ગરમીનો કહેર યથાવત: 42 ડિગ્રી સુધી પહોંચશે તાપમાન, 7 દિવસ રાહત નહીં

રાજ્યમાં ઉનાળાની ગરમી દિવસેને દિવસે વધતી જ રહી છે અને લોકો માટે બહાર નીકળવું મુશ્કેલ બની રહ્યું છે. ભારતીય હવામાન વિભાગ (IMD)ની આગાહી મુજબ આગામી 7 દિવસ સુધી ગરમીમાંથી કોઈ રાહત મળવાની શક્યતા નથી અને તાપમાન ઊંચું જ રહેવાનું છે.

40થી 42 ડિગ્રી સુધી પહોંચશે તાપમાન
આગામી દિવસોમાં રાજ્યના મોટા ભાગના વિસ્તારોમાં તાપમાન 40થી 42 ડિગ્રી વચ્ચે રહેવાની શક્યતા છે. અમદાવાદ અને ગાંધીનગર જેવા શહેરોમાં સતત 40 ડિગ્રીથી વધુ તાપમાન નોંધાવાનું અનુમાન છે. મધ્ય ગુજરાતમાં તાપમાન 41થી 42 ડિગ્રી સુધી પહોંચી શકે છે, જ્યારે ઉત્તર ગુજરાતમાં તો 42 ડિગ્રીથી પણ વધુ ગરમી અનુભવાઈ શકે છે.

સૌરાષ્ટ્ર-કચ્છમાં ઉકળાટ વધશે
સૌરાષ્ટ્ર અને કચ્છ વિસ્તારમાં પણ ગરમીનો પ્રભાવ યથાવત રહેશે. દરિયાકાંઠાના વિસ્તારોમાં ગરમ પવનો ફૂંકાવાની શક્યતા છે, જેના કારણે ઉકળાટ અને અસ્વસ્થતા વધશે. દક્ષિણ ગુજરાત અને કોસ્ટલ વિસ્તારોમાં ડિસકમ્ફર્ટ લેવલ વધુ રહેવાની શક્યતા છે.

7 દિવસ સુધી કોઈ રાહત નહીં
હવામાન વિભાગે સ્પષ્ટ જણાવ્યું છે કે આગામી એક અઠવાડિયા સુધી ગરમી અને ઉકળાટ બંનેમાં કોઈ ખાસ ફેરફાર જોવા નહીં મળે. ઊંચા તાપમાનને કારણે પાણીની માંગ વધશે અને હાઇડ્રેશન જાળવવું ખૂબ જ જરૂરી બનશે.

સાવચેતી રાખવાની સલાહ
નિષ્ણાતોએ લોકોને બપોરના સમયે બહાર ન નીકળવા, પૂરતું પાણી પીવાનું અને શરીરને ઠંડુ રાખવા માટે જરૂરી પગલાં લેવા સૂચના આપી છે. આવનારા દિવસોમાં પણ ગરમીનો પ્રકોપ યથાવત રહેવાની શક્યતા હોવાથી સાવચેતી જ શ્રેષ્ઠ ઉપાય છે.