અમદાવાદના સાણંદ GIDCમાં ભીષણ આગ, કંપનીમાં મોટું નુકસાન

અમદાવાદ જિલ્લામાં આવેલા સાણંદ GIDC વિસ્તારમાં રવિવાર (3 મે)ના રોજ ભીષણ આગની ઘટના સામે આવી છે. Ahmedabad નજીક આવેલા આ ઉદ્યોગ વિસ્તારની વન્ડર ગેટ પાસે સ્થિત IPD નામની ખાનગી કંપનીમાં અચાનક આગ ભભૂકી ઉઠતા સમગ્ર વિસ્તારમાં અફરાતફરી મચી ગઈ હતી.

ધુમાડાના ગોટેગોટા, જ્વાળાઓ દૂર સુધી દેખાઈ
આગ એટલી વિકરાળ હતી કે કંપનીમાં રહેલો મટીરિયલ, પાર્ટ્સ અને ટ્રોલીઓ જોતજોતામાં આગની ઝપેટમાં આવી ગયા. ઘટનાના કારણે આકાશમાં ધુમાડાના ગોટેગોટા ઊઠતા દૂર-દૂર સુધી દેખાઈ રહ્યા હતા. સ્થાનિક લોકોમાં ભયનો માહોલ સર્જાયો હતો.

કલાકો સુધી આગનો કહેર
પ્રાપ્ત માહિતી મુજબ, આગ એક કલાકથી વધુ સમય સુધી સળગતી રહી હતી. જ્વાળાઓ એટલી ઊંચી હતી કે આસપાસના વિસ્તારોમાંથી પણ સ્પષ્ટ રીતે જોઈ શકાય હતી.

ફાયર બ્રિગેડે સંભાળી પરિસ્થિતિ
ઘટનાની જાણ થતાં જ ફાયર વિભાગની ટીમ તરત જ સ્થળ પર પહોંચી ગઈ હતી. બે ફાયર બ્રિગેડની ગાડીઓ દ્વારા પાણીનો મારો ચલાવી આગને વધુ ફેલાતી અટકાવવામાં આવી હતી. લાંબી મહેનત બાદ આગ પર આંશિક કાબૂ મેળવી શકાયો હતો.

જાનહાનિ ટળી, નુકસાનનો અંદાજ બાકી
સદનસીબે આ દુર્ઘટનામાં કોઈ જાનહાનિના સમાચાર નથી. જોકે કંપનીમાં રહેલા માલસામાનને ભારે નુકસાન થયું હોવાની શક્યતા છે. હાલ આગ લાગવાના કારણો અંગે તપાસ શરૂ કરવામાં આવી છે.