Bindia
ગાંધીનગર જિલ્લાના કલોલમાં મહિલા હોમગાર્ડ પર થયેલા ગંભીર એસિડ હુમલા કેસમાં ન્યાયાલયે કડક ચુકાદો આપ્યો છે. કલોલની સેશન્સ કોર્ટે આરોપી રિક્ષા ચાલકને 15 વર્ષની કેદની સજા ફટકારી છે, સાથે જ 1 લાખ રૂપિયાનો દંડ અને પીડિતાને 2 લાખ રૂપિયાનું વળતર ચૂકવવાનો આદેશ આપ્યો છે.
ઘટના શું હતી?
આ બનાવ 18 જુલાઈ 2025નો છે, જ્યારે કલોલના છત્રાલ બ્રિજ નીચે મહિલા હોમગાર્ડ ભાવનાબેન પરમાર ટ્રાફિક નિયંત્રણની ફરજ બજાવી રહી હતી. આ દરમિયાન આરોપી અશોકભાઈ રમેશભાઈ રાવત પોતાની રિક્ષા ટ્રાફિકમાં અવરોધરૂપ રાખી હતી. ભાવનાબેને રિક્ષા ખસેડવા કહ્યું ત્યારે આરોપી ઉશ્કેરાઈ ગયો અને બોલાચાલી કરીને ત્યાંથી ચાલ્યો ગયો. પરંતુ તેણે મનમાં બદલો રાખ્યો હતો.
બદલાની ભાવનાથી હુમલો
થોડીવાર બાદ આરોપી ફરી ઘટનાસ્થળે પરત આવ્યો અને મહિલા હોમગાર્ડ પર એસિડથી હુમલો કર્યો. આ હુમલામાં ભાવનાબેન ગંભીર રીતે ઘાયલ થઈ હતી અને તેમને તાત્કાલિક સારવાર માટે હોસ્પિટલમાં ખસેડવામાં આવી હતી.
પોલીસ કાર્યવાહી અને ન્યાય
આ બનાવ બાદ કલોલ તાલુકા પોલીસે કેસ દાખલ કરીને તપાસ હાથ ધરી હતી અને પુરાવાઓ સાથે કોર્ટમાં ચાર્જશીટ રજૂ કરી હતી. તમામ પુરાવા અને દલીલોના આધારે કોર્ટે આરોપીને દોષી ઠેરવી કડક સજા સંભળાવી છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
