સાવધાન! અમદાવાદમાં નકલી પનીર કૌભાંડ:ગોતા અને નરોડામાં ભાંડાફોડ, ખાદ્ય સુરક્ષા પર ઉઠ્યા ગંભીર પ્રશ્નો

અમદાવાદ : અમદાવાદ શહેરમાં ખાદ્ય સુરક્ષાને લઈને ચોંકાવનારી ઘટના સામે આવી છે. ગોતા અને નરોડા વિસ્તારોમાં નકલી પનીરનું ધડાધડ વેચાણ થતું હોવાનો ભાંડાફોડ થયો છે. હેલ્થ વિભાગે મળેલી માહિતીના આધારે કાર્યવાહી કરતાં નકલી પનીરનો મોટો જથ્થો ઝડપી પાડ્યો છે અને તેને સીલ કરવામાં આવ્યો છે.

તપાસ દરમિયાન જાણવા મળ્યું છે કે આ પનીર સ્વાસ્થ્ય માટે હાનિકારક હોઈ શકે છે અને તેમાં ગુણવત્તા ધોરણોનું પાલન કરવામાં આવ્યું નથી. અધિકારીઓના જણાવ્યા મુજબ, કેટલાક વેપારીઓ દ્વારા સસ્તા અને નકલી પનીર બનાવીને બજારમાં વેચાણ કરવામાં આવતું હતું, જે ગ્રાહકોના આરોગ્ય માટે જોખમી સાબિત થઈ શકે છે.

આ ઘટનાને પગલે તંત્ર વધુ સતર્ક બન્યું છે અને શહેરના અન્ય વિસ્તારોમાં પણ ચકાસણી શરૂ કરવામાં આવી છે. સાથે જ નાગરિકોને પનીર ખરીદતી વખતે સાવચેત રહેવા, વિશ્વસનીય દુકાનોમાંથી જ ખાદ્ય વસ્તુઓ લેવાની અને શંકાસ્પદ વસ્તુઓ અંગે તંત્રને જાણ કરવાની અપીલ કરવામાં આવી છે. આ બનાવે ખાદ્ય સુરક્ષા અને ગુણવત્તા અંગે ફરી એકવાર ગંભીર પ્રશ્નો ઉભા કર્યા છે.