Bindia
ગુજરાતના મુખ્યમંત્રી ભૂપેન્દ્ર પટેલે દક્ષિણ ગુજરાતના સર્વાંગી વિકાસને વધુ ગતિ આપવા માટે સુરત ઇકોનોમિક રિજિયન (SER) માટે મહત્વપૂર્ણ નિર્ણય લીધો છે. રાજ્ય સરકાર દ્વારા 1185 કરોડ રૂપિયાના રોડ ઈન્ફ્રાસ્ટ્રક્ચર અપગ્રેડેશનના 24 કામોને મંજૂરી આપવામાં આવી છે, જે કુલ 383 કિલોમીટર માર્ગોના સુધારણા અને વિકાસ સાથે જોડાયેલા છે.
આ પહેલ વડાપ્રધાન નરેન્દ્ર મોદીના “વિકસિત ભારત @2047”ના સંકલ્પને સાકાર કરવા માટે રાજ્ય સરકાર દ્વારા તૈયાર કરાયેલા “વિકસિત ગુજરાત @2047”ના રોડમૅપનો મહત્વનો ભાગ છે. ગુજરાત સ્ટેટ ઇન્સ્ટિટ્યુશન ફોર ટ્રાન્સફોર્મેશન (GRIT) દ્વારા રાજ્યના સર્વાગી વિકાસ માટે તૈયાર કરાયેલા રિજનલ ઇકોનોમિક માસ્ટર પ્લાન હેઠળ આ પગલું લેવામાં આવ્યું છે. સુરત ઇકોનોમિક રિજિયનમાં સુરત, ભરૂચ, નવસારી, વલસાડ, તાપી અને ડાંગ જિલ્લાનો સમાવેશ થાય છે. આ વિસ્તાર રાજ્યના કુલ આર્થિક વિકાસમાં 35 ટકાથી વધુ યોગદાન આપે છે અને આગામી સમયમાં તેને વધુ મજબૂત બનાવવા માટે રોડ કનેક્ટિવિટી સુધારવા પર ખાસ ધ્યાન કેન્દ્રિત કરવામાં આવ્યું છે.
લોજિસ્ટિક્સ અને ઔદ્યોગિક વિકાસને મળશે વેગ
રોડ ઈન્ફ્રાસ્ટ્રક્ચર સુધારણા થવાથી સુરત, તાપી, વલસાડ, ભરૂચ અને નવસારી જિલ્લાના ઔદ્યોગિક હબ અને GIDC વિસ્તારો વચ્ચેની કનેક્ટિવિટી વધુ મજબૂત બનશે. જેના કારણે લોજિસ્ટિક્સ કાર્યક્ષમતા વધશે તેમજ માલસામાન અને શ્રમિકોની અવરજવર વધુ સરળ બનશે. ટેક્સટાઇલ, કેમિકલ્સ, પેટ્રોકેમિકલ્સ અને ડાયમંડ ઉદ્યોગોને પણ આથી મહત્વનો લાભ મળશે. આ સાથે કડોદ, કડોદરા, જોલવા, માંગરોળ, કોસંબા અને તડકેશ્વર જેવા મહત્વપૂર્ણ GIDC વિસ્તારોની કનેક્ટિવિટી સુધરવાથી ઔદ્યોગિક વિસ્તરણને પણ નવી ગતિ મળશે.
કૃષિ પરિવહન અને પ્રવાસન વિકાસમાં સહાય
રોડ કનેક્ટિવિટી સુધારવાથી દક્ષિણ ગુજરાતના ખેડૂતોને પણ સીધો લાભ મળશે. ખેત પેદાશો બજાર સુધી ઝડપી અને સરળ રીતે પહોંચાડી શકાશે, જેના કારણે કૃષિ ક્ષેત્રને પ્રોત્સાહન મળશે. સાથે જ સિદ્ધનાથ મહાદેવ, શબરીધામ, પાંડવ ગુફા, અંજનીકુંડ અને સંજાણની પારસી અગિયારી જેવા ધાર્મિક સ્થળો તેમજ સાપુતારા, વિલ્સન હિલ અને મહાલના જંગલો જેવા પ્રવાસન સ્થળોએ પહોંચવું વધુ સરળ બનશે.
યુવાનો માટે રોજગારીના નવા અવસર
સુરત ઇકોનોમિક રિજિયનમાં પરંપરાગત ઉદ્યોગો ઉપરાંત સેમિકન્ડક્ટર, ગ્રીન હાઇડ્રોજન અને લોજિસ્ટિક્સ જેવા ઉભરતા ક્ષેત્રોના વિકાસ માટે નવી તકો ઊભી થશે. જેના કારણે યુવાનો માટે મોટા પાયે રોજગારી સર્જાનાં અવસર ઉભા થવાની શક્યતા છે.
રાજ્ય સરકારનું લક્ષ્ય સુરત ઇકોનોમિક રિજિયનને “વિકસિત ગુજરાત @2047” માટેનું મહત્વપૂર્ણ ગ્રોથ એન્જિન બનાવવાનું છે. 2047 સુધીમાં ગુજરાતને 3.5 ટ્રિલિયન ડોલરની અર્થવ્યવસ્થા બનાવવા માટે આ રિજિયન રાજ્યના જી.એસ.ડી.પી.માં 35 ટકા કરતાં વધુ યોગદાન આપે તેવી અપેક્ષા રાખવામાં આવી છે.
