Bindia
સુરતમાં સાત વર્ષની નાબાલિક દીકરીની દીક્ષા લેવાની બાબતે ચાલી રહેલા વિવાદમાં ફેમિલી કોર્ટે મહત્વપૂર્ણ અને દુરગામી અસર ધરાવતો ચુકાદો આપ્યો છે. કોર્ટે પિતાના પક્ષમાં ચુકાદો આપતા નાબાલિક દીકરીની દીક્ષા પર તાત્કાલિક રોક લગાવી છે.
પ્રાપ્ત વિગતો મુજબ માતા દ્વારા દીકરીની દીક્ષા માટે ચોક્કસ તારીખ પણ નક્કી કરવામાં આવી હતી. જોકે, દીકરીની નાની ઉંમર, માનસિક તથા શારીરિક વિકાસ અને ભવિષ્યને ધ્યાનમાં રાખીને પિતાએ આ નિર્ણયનો વિરોધ કર્યો હતો. પિતાનું કહેવું હતું કે નાની ઉંમરે દીક્ષા લેવડાવવાથી બાળકના શિક્ષણ, સ્વતંત્રતા અને સર્વાંગી વિકાસ પર નકારાત્મક અસર પડી શકે છે.
આ મુદ્દે પિતાએ ફેમિલી કોર્ટમાં અરજી દાખલ કરી હતી. કોર્ટમાં બંને પક્ષોની વિસ્તૃત દલીલો સાંભળ્યા બાદ ન્યાયાધીશે બાળકના હિતને સર્વોચ્ચ ગણાવી દીક્ષાની પ્રક્રિયા પર રોક લગાવવાનો નિર્ણય કર્યો છે. ફેમિલી કોર્ટનું માનવું છે કે બાળક નાબાલિક છે અને આવા મહત્વના નિર્ણયો લેવામાં તેના હિત, વિકાસ અને ભવિષ્યને પ્રાથમિકતા આપવી જરૂરી છે.
કોર્ટના આ ચુકાદા બાદ સમગ્ર મામલો ચર્ચાના કેન્દ્રમાં આવી ગયો છે. આ કેસ માત્ર એક પરિવાર પૂરતો સીમિત ન રહી, પરંતુ બાળ અધિકાર, ધાર્મિક સ્વતંત્રતા અને બાળકના ભવિષ્ય જેવા સંવેદનશીલ મુદ્દાઓ પર વિશાળ ચર્ચાને જન્મ આપી રહ્યો છે.
