Bindia
અમદાવાદમાં આયોજિત ઇન્વેસ્ટોપિયા ગ્લોબલના ભવ્ય ઉદ્ઘાટન સમારંભે ભારત અને સંયુક્ત આરબ અમીરાત (UAE) વચ્ચેના આર્થિક, વ્યાપારી અને વ્યૂહાત્મક સંબંધોને વધુ મજબૂત બનાવવાનો સંકલ્પ વ્યક્ત કર્યો હતો. આ પ્રસંગે ગુજરાતના મુખ્યમંત્રી ભૂપેન્દ્ર પટેલ અને UAEના આર્થિક તથા પ્રવાસન મંત્રી અબ્દુલ્લા બિન તૌક અલ મારી સહિત અનેક ઉદ્યોગપતિઓ, રોકાણકારો અને વરિષ્ઠ અધિકારીઓ ઉપસ્થિત રહ્યા હતા.
કાર્યક્રમને સંબોધતા મુખ્યમંત્રી ભૂપેન્દ્ર પટેલે જણાવ્યું હતું કે વડાપ્રધાન નરેન્દ્ર મોદીના દૃઢ નેતૃત્વ હેઠળ ભારત અને UAE વચ્ચેના સંબંધો છેલ્લા કેટલાક વર્ષોમાં નવી ઊંચાઈએ પહોંચ્યા છે. તેમણે જણાવ્યું કે ભારત આજે વિશ્વમિત્ર તરીકે પોતાની ઓળખ વધુ મજબૂત બનાવી રહ્યું છે અને ઇન્વેસ્ટોપિયા ગ્લોબલ જેવી પહેલો બંને દેશો વચ્ચેના સહયોગને નવી ગતિ આપશે.
મુખ્યમંત્રીએ યાદ અપાવ્યું કે વર્ષ 2015માં વડાપ્રધાન નરેન્દ્ર મોદીએ 34 વર્ષ બાદ UAEની ઐતિહાસિક મુલાકાત લીધી હતી. ત્યારથી અત્યાર સુધી તેઓ સાત વખત UAEની મુલાકાત લઈ ચૂક્યા છે. બીજી તરફ UAEના રાષ્ટ્રપતિ મહામહિમ શેખ મોહમ્મદ બિન ઝાયદ અલ નાહ્યાન પણ અનેક વખત ભારતની મુલાકાત લઈ બંને દેશોના સંબંધોને વધુ ગાઢ બનાવ્યા છે. વર્ષ 2024ની વાઇબ્રન્ટ ગુજરાત ગ્લોબલ સમિટ દરમિયાન તેમને ગુજરાતમાં આવકારવાની તક મળી હતી, જેને મુખ્યમંત્રીએ બંને દેશોની મિત્રતાનું મહત્વપૂર્ણ પ્રતીક ગણાવ્યું હતું.
તેમણે જણાવ્યું કે ભારત અને UAE હવે માત્ર વેપારી ભાગીદાર નથી રહ્યા, પરંતુ સાંસ્કૃતિક રીતે પણ એકબીજાની વધુ નજીક આવ્યા છે. અબુ ધાબીમાં બનેલું પ્રથમ હિન્દુ સ્વામિનારાયણ મંદિર બંને દેશોની સાંસ્કૃતિક એકતા અને પરસ્પર વિશ્વાસનું જીવંત ઉદાહરણ છે. ગુજરાત અને UAE વચ્ચે સદીઓથી અરબી સમુદ્ર મારફતે વેપાર અને સાંસ્કૃતિક સંબંધો રહ્યા છે અને આજે તે સંબંધો આધુનિક આર્થિક ભાગીદારીમાં પરિવર્તિત થઈ રહ્યા છે.
મુખ્યમંત્રીએ ખાસ ભારપૂર્વક જણાવ્યું કે વર્ષ 2022માં ભારત અને UAE વચ્ચે થયેલા કોમ્પ્રિહેન્સિવ ઇકોનોમિક પાર્ટનરશિપ એગ્રીમેન્ટ (CEPA) બાદ બંને દેશોના વેપાર સંબંધોમાં ઐતિહાસિક પરિવર્તન આવ્યું છે. આ કરારના પરિણામે આજે UAE ભારતનો ત્રીજો સૌથી મોટો વેપારી ભાગીદાર બન્યો છે. CEPAના કારણે વેપાર પ્રક્રિયા સરળ બની છે, નિકાસમાં વધારો થયો છે અને નવા રોકાણના માર્ગો ખુલ્યા છે.
ગુજરાત અને UAE વચ્ચેના વેપાર અંગે તેમણે જણાવ્યું કે ગુજરાતમાંથી કેમિકલ્સ, ફાર્માસ્યુટિકલ્સ, જેમ્સ એન્ડ જ્વેલરી, એન્જિનિયરિંગ ઉત્પાદનો, સિરામિક્સ, ટેક્સટાઇલ્સ, કૃષિ ઉત્પાદનો અને પ્રોસેસ્ડ ફૂડની મોટી માત્રામાં UAEમાં નિકાસ થાય છે. CEPAના કારણે ગુજરાતને માત્ર વેપારમાં નહીં પરંતુ વૈશ્વિક સપ્લાય ચેઇનમાં વધુ મજબૂત સ્થાન પ્રાપ્ત કરવાની તક મળી રહી છે.
ગુજરાતની ઔદ્યોગિક પ્રગતિ અંગે મુખ્યમંત્રીશ્રીએ જણાવ્યું કે રાજ્ય આજે ભારતનું ગ્રોથ એન્જિન બની ગયું છે. એક મેજર પોર્ટ અને 48 નોન-મેજર પોર્ટ્સ સાથે ગુજરાત દેશનું સૌથી મોટું સામુદ્રિક પ્રવેશદ્વાર છે. રાજ્યમાં 51 ગીગાવોટથી વધુ રિન્યુએબલ એનર્જી ક્ષમતા વિકસાવવામાં આવી છે, જેના કારણે ગુજરાત દેશનું ક્લીન એનર્જી હબ બની રહ્યું છે. ગિફ્ટ સિટી ભારતનું પ્રથમ આંતરરાષ્ટ્રીય ફિનટેક કેન્દ્ર બની ગયું છે અને સેમિકન્ડક્ટર ક્ષેત્રે પણ ગુજરાત ઝડપથી આગળ વધી રહ્યું છે. રાજ્યમાં ત્રણ સેમિકન્ડક્ટર પ્લાન્ટ કાર્યરત છે અને દેશના સૌથી વધુ છ સેમિકન્ડક્ટર પ્રોજેક્ટ્સ ગુજરાતમાં મંજૂર થયા છે.
તેમણે જણાવ્યું કે ગુજરાત માત્ર ઉદ્યોગ માટે જ નહીં પરંતુ પ્રવાસન ક્ષેત્રે પણ અદભૂત સંભાવનાઓ ધરાવે છે. દ્વારકા અને સોમનાથ જેવા આધ્યાત્મિક સ્થળો, કચ્છનું સફેદ રણ, શિવરાજપુર બીચ જેવા એડવેન્ચર ટૂરિઝમ સ્થળો અને નડાબેટ જેવા દેશભક્તિ પ્રવાસન કેન્દ્રો વિશ્વભરના પ્રવાસીઓને આકર્ષી રહ્યા છે. પ્રવાસન ક્ષેત્રમાં પણ UAE સાથે ભાગીદારી વધારવાની વિશાળ તકો ઉપલબ્ધ છે.
મુખ્યમંત્રીએ વડાપ્રધાન નરેન્દ્ર મોદીના “વિકસિત ભારત”ના વિઝન અને UAEના “We the UAE 2031” વિઝનનો ઉલ્લેખ કરીને જણાવ્યું કે બંને દેશો સાથે મળીને આ લક્ષ્યાંકોને સફળ બનાવી શકે છે. કાર્યક્રમ દરમિયાન થનારા વિવિધ સમજૂતી કરારો (MoU) બંને દેશો વચ્ચે આર્થિક સહયોગને વધુ મજબૂત બનાવશે. તેમણે UAEના રોકાણકારોને ગુજરાતમાં નવા ઉદ્યોગો અને પ્રોજેક્ટ્સ સ્થાપવા માટે હાર્દિક આમંત્રણ પણ પાઠવ્યું.
આ પ્રસંગે UAEના આર્થિક અને પ્રવાસન મંત્રી અબ્દુલ્લા બિન તૌક અલ મારીએ જણાવ્યું કે ભારત અને UAE માત્ર વેપાર જ નથી કરી રહ્યા પરંતુ એક સશક્ત આર્થિક કોરિડોરનું નિર્માણ કરી રહ્યા છે. તેમણે જણાવ્યું કે વર્ષ 2025માં UAEના જીડીપીમાં 5.6 ટકાનો વિકાસ નોંધાયો છે અને હાલમાં દેશના કુલ જીડીપીમાં બિન-તેલ ક્ષેત્રનો ફાળો 77.3 ટકાથી વધુ છે. આ દર્શાવે છે કે UAE સફળતાપૂર્વક પોતાની અર્થવ્યવસ્થામાં વિવિધતા લાવી રહ્યું છે.
શ્રી મારીએ વધુમાં જણાવ્યું કે વર્ષ 2025માં ભારત અને UAE વચ્ચેનો દ્વિપક્ષીય વેપાર 100 બિલિયન ડોલરનો આંકડો પાર કરી ગયો છે અને બંને દેશોએ વર્ષ 2032 સુધીમાં તેને વધારીને 200 બિલિયન ડોલર સુધી પહોંચાડવાનો મહત્ત્વાકાંક્ષી લક્ષ્યાંક નક્કી કર્યો છે.
તેમણે ગિફ્ટ સિટીને ભારત-UAEના નાણાકીય સહયોગનું મહત્વપૂર્ણ કેન્દ્ર ગણાવ્યું અને જણાવ્યું કે અબુ ધાબી ઇન્વેસ્ટમેન્ટ ઓથોરિટીએ (ADIA) ગિફ્ટ સિટીમાં પોતાની પેટા કચેરી શરૂ કરી છે. સેમિકન્ડક્ટર, ફૂડ સિક્યોરિટી, ડિજિટલ ઇન્ફ્રાસ્ટ્રક્ચર, ફાઇનાન્સિયલ કોરિડોર, લોજિસ્ટિક્સ અને પ્રવાસન જેવા ક્ષેત્રોમાં બંને દેશો વચ્ચે સહયોગ સતત વધી રહ્યો છે.
ગુજરાતના ઔદ્યોગિક વિકાસની પ્રશંસા કરતાં તેમણે જણાવ્યું કે દેશની કુલ ઔદ્યોગિક નિકાસમાં ગુજરાતનો લગભગ 20 ટકા હિસ્સો છે. કેમિકલ્સ, ફાર્માસ્યુટિકલ્સ, ફૂડ પ્રોસેસિંગ, ટેક્સટાઇલ્સ અને એન્જિનિયરિંગ જેવા ક્ષેત્રોમાં રાજ્ય અગ્રણી સ્થાન ધરાવે છે અને વિદેશી રોકાણ માટે પણ ગુજરાત સૌથી વિશ્વસનીય ગંતવ્ય બની રહ્યું છે.
કાર્યક્રમના અંતે અબ્દુલ્લા બિન તૌક અલ મારીએ માત્ર ચર્ચા સુધી મર્યાદિત ન રહી પ્રત્યક્ષ રોકાણ, નવા સોદાઓ અને પ્રોજેક્ટ્સના ઝડપી અમલીકરણ પર ભાર મૂક્યો. ઇન્વેસ્ટોપિયા ગ્લોબલ અમદાવાદનો આ કાર્યક્રમ ભારત અને UAE વચ્ચે વધતા વિશ્વાસ, મજબૂત આર્થિક ભાગીદારી અને ગુજરાતને વૈશ્વિક રોકાણ કેન્દ્ર તરીકે સ્થાપિત કરવાની દિશામાં મહત્વપૂર્ણ સીમાચિહ્ન સાબિત થયો છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
