સૈફ અલી ખાનના ઘરમાં ઘુસી, હુમલો કરનાર આરોપી સુધી કઇ રીતે પહોંચી પોલીસ, જાણો ઇનસાઇડ સ્ટોરી

બોલીવુડ અભિનેતા સૈફ અલી ખાન પર છરી વડે હુમલો કરનાર આરોપીની મુંબઈ પોલીસે થાણે પશ્ચિમ વિસ્તારમાંથી ધરપકડ કરી છે. પોલીસે રાત્રે 2-3 કલાકે આરોપીની ધરપકડ કરી હતી. આ માટે પોલીસે 100 અધિકારીઓની ટીમ બનાવી હતી. આજે તેને કોર્ટમાં રજૂ કરવામાં આવશે, જ્યાં આરોપીના રિમાન્ડની માંગણી કરવામાં આવશે. પોલીસને જણાવ્યું કે તેનું નામ મોહમ્મદ સજ્જાદ છે.

-> ઘટના બાદ આરોપીએ પોતાનો ફોન સ્વીચ ઓફ કરી દીધો હતો :- ગુનો કર્યા બાદ આરોપીએ તેનો ફોન સ્વીચ ઓફ કરી દીધો હતો. આ પછી તેણે પોતાનો ફોન સ્વીચ ઓન કર્યો અને કોલ કર્યો. વાતચીત પૂરી થયા બાદ તેણે ફરી પોતાનો ફોન સ્વિચ ઓફ કરી દીધો હતો. જ્યારે પણ તે બજારમાં અથવા રસ્તામાં સીસીટીવી ફૂટેજ જોતો ત્યારે આરોપી પોતાનો ચહેરો છુપાવતો હતો, પરંતુ પોલીસે તેનો ફોન ટ્રેસ કર્યો હતો. જ્યાં પણ આરોપીની હાજરી જણાઈ ત્યાં એક્ટિવ મોબાઈલ નંબરનો ડેટા એકત્ર કરવામાં આવ્યો.

-> પોલીસે ફોન નંબર ટ્રેસ કર્યો :- પોલીસે સૈફના ઘર, બાંદ્રા રેલ્વે સ્ટેશન, દાદરમાં હાજર નંબરોનો ડેટા એકત્રિત કર્યો. ત્રણેય જગ્યાએ એક મોબાઈલ નંબર એક્ટિવ જોવા મળ્યો હતો. આરોપીએ જે નંબર પર ફોન કર્યો હતો તેનો ડેટા કાઢ્યા બાદ પોલીસે તે નંબર પર કોલ કર્યો અને પછી તેમને રૂબરૂ જઇને મળી, અને તેમને આરોપીનો ફોટો બતાવ્યો. તેઓએ આરોપીની ઓળખ કરી અને કહ્યું કે તે તેમની સાથે જ મજૂર તરીકે કામ કરતો હતો.

-> સવારે 2 વાગ્યે થાણેથી ધરપકડ :- આ પછી પોલીસે આરોપીઓને પકડવા માટે અલગ-અલગ વિભાગોની 30 જેટલી ટીમો બનાવી હતી. પોલીસ ટીમે થાણે પશ્ચિમના હિરાનંદાની એસ્ટેટમાં TCS કોલ સેન્ટરની પાછળ આવેલી મેટ્રો કન્સ્ટ્રક્શન સાઇટ પર દરોડો પાડ્યો હતો. આરોપી અહીંના લેબર કેમ્પમાં છુપાયો હતો. સૂત્રોના જણાવ્યા અનુસાર આરોપીએ પોલીસને જણાવ્યું કે તે સૈફના ઘરમાં ચોરીના ઈરાદાથી ઘુસ્યો હતો. તેણે કહ્યું કે તેને ખબર નહોતી કે તે સૈફ અલી ખાનનું ઘર છે. પોલીસના જણાવ્યા અનુસાર આરોપી 5-6 મહિના પહેલા મુંબઈ આવ્યો હતો.